لا تسألوني...

وها قد وجدت منى حضنا دافئا يحتويها.....

معلمتها الحنونه.....تسأل عن أخبارها.....وتطمئن عليها......وها هى تجر معها أذيال الحديث عما يؤلم قلبها الصغير

"ها يا منى....قوليلي انتى ليه متضايقه ان بابا بواب......هكذا ارخت "مس سلمي" بساط الحديث لطالبتها......

ولم تتم حديثها الا وقرع الحارس جرس بدء الحصص الذي يلي الفسحه

آااااه يا خساره.....ملحقناش نقول حاجه.....طب بصى يا منى استنينى بعد المدرسه نروح مع بعض......قالتها سلمى متحسره وختمت بها اللقاء القصيره مع فتاتها المهمومه

عادت منى تعلوها ابتسامة طمأنينه الى فصلها......ولكنها وجدت ما لم تتمناه

عادت لتجد جمع من زميلاتها يحيطونها ويهيلون عليها أمطار التمازح والسخريه والاستهزاء

فواحدة تقول : آه عم عبده دا بواب انما ايه......دا بابا كل يوم يديلو قرشين عشان هو مسكين وعنده عيال

والاخرى تقول : لا يا بنتى البوابين دول عايزين اللى يأدبهم.....دا كل يوم نرميله شيء وشويات وبرضه مبيسمعش الكلام.....

وهكذا...تُطعن المسكينة بسكين بارد.......ترى نفسها وحيده وسط ذئاب يتخفين وراء مريلة مدرسيه...تبكي بدون صوت.....وتتمنى لو تنشق الارضُ فتبلعها !!!!

لم ينقذها من هذا الطوفان الا معلم الرياضيات الذي دخل الفصل ليؤدى حصته

الحصة تلى الحصه.......ومنى في عالم آخر.......ترافقها فيه الدموع والآهات والحسرات

وانتهى اليوم الدراسي.....ونسيت منى ميعادها مع "مس سلمى"......فلا عقل ولا قلب....ولكن دموع وحسرات

سارت الى بيتها الفقير بخطوات متهالكه......ترى الطريق طويلا رغم قصره.....

بسرعة الريح...تخطت بوابة البيت وهرعت الى غرفتها......

وبجنون حاد لملت كتبها وأقلامها وأوراقها لتقطعهم أشلاءا وهى تصرخ بصوت عال

" والله ماانا رايحه المدرسه دى تانى......انا كل دا بيحصلى ليه.......هو كان بأيدي أبقي بنت عم عبده ولا الست أم محمد.....اشمعنى انا اللى حظى كده......اشمعنى

وفي تلك الاثناء كان يقف عم عبده والست ام محمد وراء الباب.....يسمعون كلمات منى الداميه......وبدمعة حزينه قال "عم عبده"......ليه يا بنتى كده.......دا انا شارب المر عشانك......مانع نفسي من كل حاجه عشان مدرستك وتعليمك......يا خسارة تعبي فيكِ

كفكفت الست "أم محمد " دموع زوجها وواسته.....معلش يا ابو محمد......متضايقش نفسك عشان خاطرى.....أكيد بس حد ضايقها في المدرسه ولا حاجه.....ولا تزعل نفسك أنا هجيبهالك من شعرها تتأسف

نظر اليها نظرة حزينه ثم ولّى صامتا

البيت يخيم عليه صمت وسكون.......الأب شارد.....والأم يمتلكها الأسى.....ومنى لازالت تبكي وتتحسر على حالها .....

وهكذا حتى جاء المساء

البيت يطرق بابه طارق........

"مين اللى بيخبط؟"......كان نداء الست أم محمد للطارق

أنا أبله سلمي يا حاجه.....مدرسة منى في المدرسه

وهنا هرعت الست ام محمد الى الباب وفتحت

يا أهلا وسهلا يا أبله.....اتفضلي اتفضلي......خير يارب ان شاء الله

سلمى : خير طبعا يا حاجه ان شاء الله.....أنا بس حبيت أطمئن على منى عشان مقابلتهاش بعد المدرسه......هى عامله ايه

ام محمد : والله يا أبله آديلها يومين قافله على نفسها الاوضه وعياط ونكد....والنهارده قعدت تقطع في الكتب بتاعتها وتقول ليه انا ابقي بنت بواب وعامله بسيطه......لما خلت ابوها المسكين يزعل ويدمع.....

سلمى : لالالالا .....لا حول ولا قوة الا بالله.....للدرجادى

ام محمد : آه والله يا أبله

سلمي : معلش معلش.....ممكن بس تدخلينى ليها أتكلم معاها شويه

ام محمد : طبعا با أبله ..... اتفضلي اتفضلي

استأذنتا للدخول فأذنت لهما منى.......ثم تركتهم الام وأغلقت الباب

وهنا هرعت منى لتحتضن معلمتها وهى تبكى وتقول

شوفتى يا مس البنات عملوا فيّ ايه النهارده......

سلمى : أنا عرفت .... نورا صاحبتك قالتلى.....عشان كده جبت العنوان وجيتلك

بصي يا منى عايزاكى تفتحيلي قلبك وتسمعينى كويس......اسالك سؤال .... في أعظم ولا أشرف من الأنبياء عليهم السلام

منى : لا طبعا يا مس

سلمى : طب تعرفي أن من الانبياء من كان خياطا....ومن كان نجارا....ومن كان حدّادا...ومن كان راعى غنم

.......طيب دول أشرف الخلق وأكرمهم عند ربنا سبحانه وتعالى......ومع ذلك ربنا اختار لهم هذه المهن.......ولو كانت هذه المهن عيبا وعارا لما كان الله اختارها لهم.......مش كده ؟

منى : فعلا يامس بســـ....

سلمى : استنينى بس.......تخيلي يا منى لو كان الدنيا دى كلها دكاتره بس......كنا هنلاقي اللى يبنى لنا البيوت......ويخيط لنا الثياب......ويبيع لنا الطعام.....ويصلح لنا الكهرباء.......وينظف شوارعنا من القمامه.........مكنش هنلاقي طبعا

ودى سنة ربنا في كونه.....خلق كل الناس لوظايف متنوعه باشكال وامكانيات متنوعه......والكل بيخدم التانى في مجال......ومينفعش حد فيهم يستغنى عن دور الآخر......صح ولا لأ ؟

طيب......يعنى كده احنا اتفقنا ان الشغل عمره ما كان عيب.....لان المجتمع في حاجه للجميع.....من أعلى واحد لآخر واحد....ومستحيل يقدر يستغنى عن حد منهم.........

النقطه الثانيه بقى........الفقر.......برضه الفقر عمره ماكان عيب.......انتى ممكن تكونى فقيره بس عفيفة النفس وغنيه بكل شيء

الغنى عمره ما كان غنى مال فقط......أنتى غنيه باستغناءك عن الغير....غنيه بخلقك وأدبك واحترمك.....تمام

طيب......النقطه التالته والمهمه بقي......تعرفي انك في نعمه كبيره

منى : أنــــــا كده في نعمه !!!

سلمى : طبعا يا منى......ربنا وزع الارزاق وقسم العيش بين البشر.......ودا من عدله ورحمته.....دا عطى له مال....وده اعطاله صحه.....ودا اعطاله اولاد صالحين.......ودا اعطاله عقل مبدع......وهكذا

فاانتى حرمتى انك تكونى غنيه وبنت شخصيه كبيره صح.....بس اعطاكى جمال وأب وأم بيحبوكى ويخافوا عليكى.....وبيتعبوا عشان خاطرك.....ربنا خلاكى تدخلى مدرسه وتتعلمى.....وغيرك فقرهم بيحرمهم من التعليم.......صح

منى : فعلا يا مس

سلمى : أنا لو قلتلك يا منى هديكى كل الفلوس اللى انتى عايزاها.....وهعيشك احسن عيشه......وهتبقي بنت فلان الفلانى ......بس بشرط.........هتبقي قبيحه ووالدك ووالدتك بيكرهوكى وتبقي فاشله في التعليم........ووووو......هتوافقي

منى : لا طبعا يا مس أعوذ بالله

سلمى : يعنى المال مش هيفيدك ساعتها.....صح ولا لا

انتى ربنا خلاكى بنوته مجتهده وشاطره.....وعندك اب وام لو طلبتى عنيهم هيدوهالك.......اتجدعنى بقي واثبتى ذاتك وكافئيهم على تعبهم عشانك.....لما انتى تبقي طبيبه او مهندسه او مدرسه.....هتبقى حققتى لنفسك وضع ومكانه.....وفي نفس الوقت هتبقي رديتى الجميل لاهلك مش كده

منى : فعلا يا مس.....

سلمى : تمام يا ستى.....دلوقتى حالا.......تلمى كتبك وترتبيها ......وتتأسفي لبابا وماما وتبوسي ايدهم .....وجرى على اوضتك تذاكرى وتجتهدى

منى : بس يا مس البنات اللى ضايقونى

سلمى : زى ما قلتلك.....انتى لما هتكونى متفوقه هتثبتى ذاتك وتبقي احسن منهم......ومحدش هيقدر يتكلم معاكى بعد كده.....لانك هتفرضي ذاتك واحترامك على الجميع.....اتفقنا يا باشا

منى مبتسمه.....اتفقنا يا مس

ثم قامت وعانقتها قائله.....انا مش عارفه اشكر حضرتك ازاى

سلمى: بتفوقك واجتهادك وبرك....هتقدميلي اكبر شكر....

وهنا دخلت الحاجه ام محمد تحمل صينية بها كوبا من الشاي.....قامت منى اليها بسرعه لتحملها عنها وقالت....عنك يا أمى

والام لا تصدق اذنيها.....يوه... البت جرالها ايه

ثم أمسكت منى بيديها وقبلتها قائله......سا محينى يا أمى .... معدتش ازعلك تانى ابدا انتى وابويا...وان شاء الله هرفع راسكم واشرفكم ادام العالم كله

ابتسمت "مس سلمى " وقالت.......طب يا جماعه استاذن انا بقى......وزى ما اتفقنا يا منى....عايزه اشوفك بكره اول واحده في المدرسه ماشي يا جميل ....مع السلامه يا حاجه اى خدمات

ام محمد : يا أبله خليكى شويه دا انتى نورتينى والله

سلمى : الله يخلكى .... أجيلكم يوم نجاح منى وتفوقها ان شاء الله......السلام عليكم

------

وهكذا مضت الايام والاعوام......لترى سلمى حالها وقد صارت طبيبة أسنان ذات قدر......وكانت سلمى احدى مرضاها......

مس سلمى مش ممكن !!........قالتها منى بذهول واندهاش

سلمى : منى !!.....قصدى دكتوره منى........ما شاء الله .....ايه يا بنوته الجمال دا كله

منى : دا كله بفضل ربنا ثم فضلك يا مس......بجد أنا مش عارفه اردلك الجميل اللى عملتيه معايا ده ازاى

سلمى : اخلعيلي ضرسي بشويش.....كده هتبقي ردتيلي الجميل

........منى : هههههه....بس كده.....من عنيا يا مس

************

وانتهت قصة منى مسطرة حكمة عميقه.....أن العمل ما كان ليعيب صاحبه.....وأن عدل الله جل وعلا جعله يقسم الارزاق على عباده حتى لايظلم منهم احد ولا يهضم أحد منهم حقه......وأن قيمة الانسان تعلو بذاته واجتهاده.......لابمجد أبيه وأمه

ــــــــــــــــــــــــــ تمت ــــــــــــــــــــــــــ