لا تســألوني

احساس القلق الرهيب يسيطر على الام الحنون.......حديث صراعى بداخلها وتساؤلات لا تهدأ.....يا ترى البت مالها
.ما كانت الصبح كويسه !!!.......

لم تر المسكينة حلا لهذا الصراع الا أن تذهب مسرعة لتتفقد حال ابنتها .......

دخلت عليها بلا استئذان....لتجدها كسرت المرآة بقبضتها التى صارت مقطراً للدماء.....ومن هولها صرخت......منـــــــــــــــى!!!!......ايه اللى عملتيه ده يا مجنونه

ثم هرعت اليها لتطمئن علي كفها المخضب بالدماء.......وما ان أمسكتها بحنان الا وقالت لها منى وهى تبكى: سبينى يا أمى الله يخليكى دلوقتى حاسه انى عايزه اقعد لوحدى شويه

الام في اضطراب واشفاق :.........يا بنتى الله يخليكى ريحيلي قلبي حرام عليكى......قوليلي بس ايه اللى خلاكى تعملى فى نفسك كده

منى وقد بدا عليها الغضب :.....يا أمى بقولك سبينى......انتو مش حاسيين بيا ليه.....سبينى بدل ما اعمل في نفسي حاجه عشان استريح

الام : خلاص خلاص يا بنتى على راحتك ....أنا طالعه اهو خلاص...هدى انتى بس حالك

ثم خرجت وهى تسترق النظرات المشفقة اليها....تود المكوث.....لكن الخوف على فتاتها أكبر

ومضي اليوم والليل وجاء الصباح......دخلت "الست ام محمد " على منى لتوقظها لتذهب الى مدرستها

وعلى غير العاده وجدتها تتقلب على سريرها ولم تقم

الام : منى.....قومى يا بنتى عشان مدرستك

منى : لا يا مه مش عايزه اروح النهارده

الام : ليه يا منى....معقول انتى اللى تقولى كده

منى : ايوه يا مه خلاص قولتلك مش هروح خلصنا بقي

الام : اللى يريحك يا بنتى...آه لو اعرف بس اللى مضايقك

ثم خرجت المسكينة بخفي حنين للمرة الثانيه.....وهى لا تعلم أنها سبب حزن ابنتها....نعم هي السبب ولكن ليس برغبتها

-------------

في المدرسه

مس سلمى : السلام عليكن يا بناويت....عاملين ايه النهارده

كويسين يا مس

طيب كويس......قولولى مين اللى غايب ومين اللى حاضر عشان أقيدهم في كشف الغياب والحضور

وهنا قامت احدى الطالبات وذكرت لها انه لم تغب الا طالبة واحده....وهى منى عبده

سلمى : منى...؟!....مش هى دى يا بنات اللى كانت متضايقه امبارح وعيطت

اه يا مس

طيب خلاص أنا هبقي اسأل عليها وأطمئن

.........

مر اليوم الدراسي......وهرعت سلمى الى مسئولة شئون الطلاب لتسأل عن تلميذتها الغائبه.....فأخرجت المسئولة لها ملفا به كل المعلومات عن "منى"

وبعد التجوال بناظرتيها في الورقه عرفت سبب اضطراب منى وبكاءها ..... انه "عم عبده " البواب البسيط.....

.لا حول ولا قوة الا بالله......ألهذا بكيتى يا منى .....قالتها تحدث نفسها متحسره.....لا دى انتى عايزه قاعده

.....

وجاء اليوم التالى......دخلت منى قاعتها يخيم على وجهها وجوم وشرود.......تحدثها زميلاتها ويسألنها عن سبب غيابها بالامس وهى لا تسمعهم...حتى بدأت الحصه

دخلت معلمتهم المحبوبة عليهم وألقت السلام....ونظرت لتجد منى جالسة في مكانها...ابتسمت ابتسامة خفيفه ثم بدأت حصتها.....وما ان انتهت الا وقالت : منى عايزاكى في الفسحه لو سمحتى

هزت منى رأسها مستجيبه

وسط الفناء الواسع يلعبن الفتيات ويلهين.......ومنى تجر خطواتها الواجمة الى معلمتها .....

تعالى يا منى اقعدى جمبى....هكذا استهلت "مس سلمى حديثها معها ...ثم تابعت :......ها يا جميل....يعنى مشفناكيش امبارح....خير في حاجه

منى : لا يا مس مفيش حاجه....كنت تعبانه شويه

سلمى : شفاكى الله وعافاكى....ايه الجرح اللى في ايدك ده

منى : أأ.....اصل......أصلي اتعورت في ازاز مكسور

نظرت اليها "مس سلمى " نظرة حانيه وأمسكت بيدها......ثم قالت : منى أنا عرفت ايه اللى كان مزعلك وخلاكى تعيطى وكمان تغيبي امبارح......زعلانه عشان بابا بيشتغل بواب بسيط .....مش كده ؟

نظرت اليها منى في صمت ثم بكت وبصوت متحشرج قالت : ايوه يا مس

وفي تلك اللحظات كانت تراقبهن فتاتان خبيثتان وتتجسسن عليهن....

قالت احداهما للاخرى : .....الله الله .....بقي منى اللى عاملالى فيها بنت فلان الفلانى صاحب الشركات والمصانع ...طلعت بنت حتة بواب لا راح ولا جيه...لا ...دى لازم المدرسه كلها تحتفل بيها النهارده .....يللا بينا يا بنتى دا احنا ورانا شغل كتير

فماذا فعلن ودبرن.....انتظروا البقيه

:)