جائتنى بطلتها المميزه.....وابتسامتها الجميله......وقد طبعت الشمس عليها علامتها عندما تتلاقي هى ومياه المصايف
دندونه حبيبتى ...ازيك ياعسل...ايه اللى عمل في وشك كده.............هكذا استهللت حديثي معها
اجابتنى......معلش بقي اصلي كنت في الفيوم بتفسح
اه يا عم مين قدك .... طب كنتى خدتينا معاكى يا ستى نتفسح برضه
ضحكة جميله ارتسمت على وجهها........معلش بقي مره تانيه
وكالعاده تهاوت بنا الكلمات في كل حدب وصوب......ولا أدرى ما الذي جر بنا الحديث الى الآخرة والموت وما شاكل......
بعبارة عجيبه تمحور حديثنا من عام الى خاص.........قالت لى......يا ستى دى الدنيا دى حلوه احلى م الآخره بكتير....بذمتك في الاخره هتقدري تضحكى الضحك ده
ابتسمتُ ابتسامة عريضه وقلت لها ....والله ؟؟......دا أحنا ان شاء الله هنضحك اكتر من كده وأحسن من كده مية مره
أجابتنى وقد ارتسمت على وجهها علامات التعجب.........ياسلام......طب هو في الاخره في تليفيزيون كده ولا حاجات بتسلي الواحد...
قلتُ لها.......ماشي يا ستى طيب وانتى بتتفرجى دلوقتى على التليفزيون ومبسوطه مش ممكن النور يقطع ....او يجيلك مشوار ضرورى......او اى حاجه تخليكى متكمليش مشاهده
اجابتنى ....آه
قلت لها.....طيب.....يعنى كل حاجه حلوه في الدنيا دى مبتبقاش كامله...وممكن يطلعلك اللى يفسد عليكى الاستمتاع بها......لكن في الاخره النعيم لاينفذ وقرة العين لا تنقطع....واستحاله حاجه هتفسد عليكى استمتاعك باى شيء.......شوفتى بقي الآخره احلى من الدنيا ازاى
قالت لى في عبارات لا يمكن أن يخرجها جوف طفلة أبدا....زادتنى لها اعجابا وتعجبا........" أنتى بتقولى على الدنيا دى وحشه.....هو أنتى لسه شوفتى منها حاجه...دا انتى لسه في عز شبابك لا جواز ولا عيال ولا شغل ولا هموم.......الدنيا مليانه ...لسه بدرى على ما تقولى عليها كده.....انتى لسه صغيره "
.بعد دقائق من الذهول والدهشه حاولت جمع كلماتى لاتابع الحديث معها.....مازحتها قائلة ......ايه يا بت انتى ده ......لالالا انتى مستحيل تكونى عيله صغيره ....دا انتى واحده كبيره متخفيه في شكل طفله....انتى عندك كام سنه يا بت...اعترفي حالا..........
تعالت ضحكاتها وقالت......9 سنين يا أبله والله
قلت...ماشي ماشي يا ست هانم .....بس أديكى اعترفتى أهو أن الدنيا وحشه...دى "دنيا " وحشه أوى
قالت......أنا وحشه .....مااااشي.....شوفي مين بقي اللى هيجيب لكم البسكوت تانى (((:
-----
وانتهى الحديث.....واستأذنت دنيا لتذهب الى متجر الجمله لتشترى بضاعتها التى ستبيعها في يومها التالى.......وابتسامتها الرائعه وحبها للحياه يجرى باوصالها......فهى ترى في عملها اعتمادا على النفس وقوة في الشخصيه وعونا للاهل....سعيدة بعملها.....ومحبة لعالمها البسيط....
صدق من قال ان السعادة داخليه...وبابها الاول هو الرضا بالقليل ...والقناعة بما في اليد.....
.حفظك الله يا دنيا وأدام عليكِ بسمتك ورضاك.......
12 التعليقات:
بسم الله ماشاء الله
بجد فتاة متميزه
لان السن مش بيفرق
فيه ناس عندها 10 سنين واحسن من اللي عندهم 30
فكريا وثقافيا وكمان اخلاقيا
سبحان الله يبدو أن الدنيا علمتها كثيرا حتى أعطتها من اسمها
تفكير طفله ..معتقدش ابدا
والانسان لا يقاس بالسنوات انما بالخبرات
ربنا يبارك فيها ...ويقويها على ماهيه عليه ..ويحفظها
وفعلا زي كلام حضرتك ...الدنيا متاع زائل ..ولا تكمل لاحد ابدا
ربنا يزيدك من علم وفقه في الدين
السلام عليكم
لا اله الا الله
ما شاء الله لا قوة الا بالله
ساعات الهموم بتكبر قبل الاوان
ربنا يبارك فيها يارب
ويحفظها من كل سوء
بارك الله فيكي حبيبتي
وكل عام وانت بالف خير
حسن حنفي
كلام تمام فعلا
شكرا للمرور
عصفور المدينه
فعلا والله يا فندم
اللى بحكيه ميجيش حاجه م الحقيقه كمان
عبد الهادى وساره
ربنا يبارك فيكم ويكرمكم يارب
نورتوا
اختى الحبيبه عاشقة النقاب
وانتى بالف صحه وسلامه يا غاليه
بوركتى
ما شاء الله تبارك الله
ربنا يحفظها يارب ويحفظك
صحيح في اطفال كتير بيبان عليهم اكبر من سنهم
بس الدنيا مش وحشة .. ده هي طريقنا للآخرة.. يمكن اللي بيخليها وحشة افعال ناس كتير فيها .. الدنيا جميلة بطاعة الله
تقبلي تحياتي
إرسال تعليق